أحلى قصة حب في أحلى مدينة ( العين)

اذهب الى الأسفل

أحلى قصة حب في أحلى مدينة ( العين)

مُساهمة من طرف عبود في الخميس أكتوبر 25, 2007 2:30 am

السلام عليكم ورحمة الله وبركاته
بعد غيبة طويله رجعت ومعاي قصة انشاء الله تنال اعجابكم
لاني قريتها في احد المنتديات وحبيت انكم تستمتعون مثل ما استمتعت
اخليكم مع القصة....

احلى الروايات الامارتيه الرومانسيه


مريم وسلطان .. سنين حب جارفه قويه احاطت بهم .. ولكنهم بالمرصاد لها..

احداث وايد مشوقه ورائعه . تابعو مريم وسلطان ..





مريم موظفة ناجحة في اتصالات، ومن الشخصيات المحبوبة
والمحترمة، وكانت حلوة ورقيقة وحساسة
خلصت دراستها الجامعية وعندها ماجستير من جامعة العين
(الامارات) في الإدارة العامة كلية إدارة واقتصاد، يعني
بنت شاطرة وذكية ماشاء الله عليها، وعمرها 27 سنة ومع ذلك
ما تزوجت، مب لأنها ما لقت حد يتزوجها، بالعكس كانت دوم
مرغوبة وما تمر فترة إلا وتنخطب لأنها مثل ما قلت بنت حلوة
وناعمة ودلوعة وبنت ناس محترمين يعني بنت قبايل بس هيه
اللي متريد
يوم السبت الساعة 12 الظهر كانت في مكتبها، وياها الدوام
ولد خالها الصغير هو مب صغير وايد عمره 19 سنة
خليفة: السلام
مريم: هلا وغلا... وش اللي ذكرك فينا
خليفة: لا والله .. حلفي بس انتي ... تدرين ان عندي جامعة
ومشغول.. انتي اللي مقطعة نفسج من كثر ما تيين عندنا
وتسئلين عنا
مريم: منو الأكبر ... منو اللي لازم يسأل عن الثاني ...
بعدين انتوا عيال بن صالح كلكم نفس الشي ... من تكبرون
الواحد يغسل ايديه منكم
خليفه: اقول أنا ياي اسولف عندج... انتي ما تلقين حد تفجين
فيه عقدج من هالعايلة غيري...
مريم: شو أسوي ... تعودت محد غيرك معبرني
خليفة: عشان بس تعرفين قيمتي
مرين: قصورك بعد... تروم ما تسأل ولا تسلم ... جان هالكثر
تعبت وياك وربيتك ودرستك .. وفي الأخير تلبسني ... تسويها
مب من عيال بن صالح
خليفة: مريامي ... تراج كلتيلي فوادي ... انتي شو مشكلتج
الحين ... بتعزميني الحين على شي أشربه ... ولا صايره
بخيلة ...
مريم: حاظر عمي ... وتطلب له عصير برتقال من الكانتين ...
وتقوله: الا صدق انت شو يايبنك هنيه .. ما عندك محاظرة
الحين
خليفة: لا ما عندي محاظرات الحين .. وياي أدفع فاتورة
تيلفوني ... فقرتونا ياهالاتصالات حشا .... حرامية ...
مريم: محد قالك ترضع التيلفون رضاعة الا لاحقنهم اللي اكبر
منك
خليفه: سو مشكلتج مع اللي أكبر مني انتي .. اريد أفهم
مريم: سلامة راسك ماشي ... خالي وخالوه شحالهم .. تصدق
تولهت على خالي وسوالفه
خليفه: خالج مطيح في العزبه ، هو وولده سلطان معسكرين زام
الصبح خالج ... وزام العصر ولده ... جنه محد مسوي عزب
غيرهم
مريم: هاهاها هوه من اليوم وأمس من يوم يومهم ... شو مضيع
سلطان الا العزبه ... وأمك شحالها
خليفه: يعني ما تعرفينها، حنانه كالعادة .. ونجره هيه
وأبوي ... الموال اليومي المعتاد صبح وظهر وعصر وعلى العشا

مريم: هاهاهاها .. يا حمار عيب عليك أمك
خليفه: يدوه... روعه ولا أحلى منها .. راعية سوالف وضحك
ولعب ورقه ... أمي نحسه طالعه على منوه ما عرف
مريم: خلوف ... عيب يا حمار
خليفه: زين زين ... برايج بسكت أدري فيج المحامي الأول مال
أمي ... الا بسألج ... كم تعطيج راتب
مريم: خلوف بتسكت ولا أخبرها
خليفه: لا بسكت وبروح
مريم: وين ما شبعت منك
خليفه: ولا بتشبعين... أنا ما ينشبع مني ... بروح عندي
محاظرة الساعة وحده وعشرين ... ياللا باي ...
ويقوم عشان يروح وهوه عند باب المكتب
خليفه: اقول باجر الاربعاء... الشباب كلهم في البيت تعالي
... والله ولهنا عليج ... من زمان ما قعدتي ويانا قعده
محترمة
مريم: ليش البنات بين باجر من بوظبي ...
خليفه : قصدج الحريم ... هيه بين هن ورياييلهن .. وبعد
خواني وحريمهم بيون .. .تعالي
مريم: بشوف ... إذا فضيت بمر
خليفه: لا شو تمرين ... تتغدين وتقيلين وتتعشين ...
وبنوديج العزبه ... ترى ناقتج خمريه ولدت ويابت بكره...
سلطان سماها عنج.. تعالي واجعيه .. وسميها بكيفج
مريم: صدق ... ليش ما قلتلي ... شو سماها
خليفه: ليش سلطان ما قالج ... على بالي هوه كلمتج وقالج
مريم: سلطان ما يكلمني ولا يقولي شي ... ما تعرفه ... نحس
ما ادري على منوه طالع
خليفه: هاهاهاها صدق ما تدرين ؟ ... سماها صوغه
مريم: هاهاها انا ما قلت شي ... انت اللي تقول .... زين
أنا قايله اني أبغي بكره أسميها صوغه
خليفه: زين مريامي برياج أنا بتأخر عن الجامعه إذا قعدت
أكثر ... تعالي باجر ... باي
ويطلع خليفه من مكتب مريم وترد مريم تكمل شغلها ...
بس ما قدرت ما تفكر في خالها وعياله وخصوصا سلطان ... هي
من بعد ما تزوجت روضه أصغر بنات خالها ما قامت تقعد في بيت
خالها ويوم تمر عليهم تسلم عليه وعلى حرمته ... وتطلع وإذا
طولت تقعد ربع ساعة ... وتختار االأوقات اللي ما يكون
سلطان فيها في البيت

يوم كانت صغيرة ما كانت تفارج بيت خالها ... ربت فيه مع
البنات وهيه أكبر من بنات خالها الثنتين ... ومع ذلك عرسن
أول ما خلصن ثانوية .. تزوجن أثنين من أولاد خوالها... في
بوظبي .... وعيال خالها الكبار شلوا حريمهم من بيت خالها
وراحوا بوظبي واستقروا هناك عشان أشغالهم ... ما تم في
البيت غير سلطان وخليفة ... وهيه
كانت دوم بيت خالها عشان البنات خاصة إنها أصغر وحده عند
أهلها وما عندها إلا ثلاث خوان أكبر منها متزوجين
*************

في بيت مريم

قاعده في الصالة مع أبوها وأمها وأخوها حمدان أصغر خوانها
عمره ثلاثين سنة ومتزوج مها وكانت قاعدة وياهم ... وعنده
ولدين
مريم: أبويه ... ناقتي اللي عاطني إياها خالي أحمد ولدت في
عزبتة خالي ... يابت بكرة ...
حمدان: هيه صح قالي سلطان أقولج يوم تلاقيت وياه صوب
عزبتنا ... سماها صوغة
أبو مريم: مبروك .. بس عاد إن شاء الله تكسر التيم ...
وتييب الأول
مريم: يا حافظ ... وليش ما قلتلي .. إنه قالك
حمدان: ليش هو ما قالج ... نسيت ... منو قالج إنتي ؟
مريم: خليفه ياني المكتب اليوم وقالي = 1


مها: من زمان ما يانا ولا كبر خلاص ... يستحي يخطف
أم مريم : هيه يستحي البيت ممزور بنات عشان يستحي ... الا
ما بيطلع أحسن من اللي أكبر عنه ... يخطفن سنين أنا عيال
خويه أحمد ما أشوفهم .. الا جان بيون يسلمون في الاعياد ..

مريم: أمايا حرام عليج ... حليلة يدرس في الجامعه
أم مريم : الناس كلها عيالها تدرس في الجامعه ما شوفهم
قاطعوا هلهم
وتقول مريم حق مها : كله منج ... الحين خليتها تقرض الولد
... شو يفجه من لسانها
مها: عموه ... لا تطرين خليفه ... مريامي ما يعيبها فيه
أبو مريم : مريم ما يعيبها فيهم كلهم .. لازم مربينها ...
ما كانت تقعد في البيت يوم صغيرة كثر ما تقعد هناك .. ظنتي
تحب خالها أكثر مني
حمدان: هاهاها أبويه لا يكون تغار
ويضحكون كلهم على ابو مريم
مريم : شو أسوي ما يبتولي إخت ... كله أولاد .. وزياده
عيال خالي بعد ايون البيت ينمزر أولاد ... هناك أروح عند
البنيات
أبو مريم : من أمج اللي ما طاعت اتييب لج إخت ... قلتلها
بس ما طاعت الشور يوم كنتي صغيره
أم مريم : خلك عن هالرمسة الفاضية الحين ... هالكبر وتريد
عيال ... روح دور لك حرمة غيري ... ما اريد بسني الله
يخليلي عيالي بيسدوني أنا
أبو مريم: سمعوا شو تقول ... تدرين قلبي ما يطاوعني أحط
عليج حرمة ... يوم كنت شباب وبصحتي ما حطيت فوق راسج وحده
.. الحين أييبلج ضرة ... ما يطيع زينج يا أم حميد
مريم: يا حافظ يا حافظ ... شو هالغزل عيني عينك
مها : تسمع أبوك حمدان ... تعلم منه شوي



يتبع...

_________________

عبود
مشرف
مشرف

عدد الرسائل : 85
تاريخ التسجيل : 17/10/2007

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: أحلى قصة حب في أحلى مدينة ( العين)

مُساهمة من طرف عبود في الخميس أكتوبر 25, 2007 2:34 am





مملكة الاحلام شكراا ع مرورج الكريم

وها تكملة القصة وانشاء الله تعيبكم



مها : هاهاهاها ... لازم مب ريلي ...
مريم: زين روحي سوي اللي قلت لج عليه
مها: اوكي
مريم: يلا باي
مها : باي
بعد ما سكرت مريم عن مها .. قعدت تشوف أغراضها اللي مخلتنهن في الغرفة ... روايات عبير وأحلام اللي كانن هي وبنات خالها يقرنهن بالدس عشان الشباب في البيت يعصبون يوم يشوفونهن يقرن روايات لقتهن مكانهن تحت الشبريه .... ودفاتر مذكراتهن ... دفترها كانت في كل يوم تكتب بيت شعر عشان إذا حد فتح الدفتر ما يفهم شو اللي مكتوب بس هي تذكر من بيت الشعر اللي مكتوب ... ونفس الشي دفاتر روضه وحصه... كل الدفاتر كانن عندها عشان تدسهن بعد ما عرسن .... ولقت بعد تحت الشبرية صندوق صور .... صورهم وهم صغار صورها وصور روضه وحصه .... كم كثر كانن يصورن ... صور سلطان وأحمد زوج حصه .... وحمد زوج روضه .. بس هاي الصور كانت قبل لا يعرسون .. الصور اللي بالدس .....
دخلت الخدامة على مريم وهي تشوف الصور .. شاله الكيس اللي طرشته لها مها ...
الخدامه: maryamy this things from your house
مريم: أوكي روز شكرا خليه
الخدامة: okay do you want any thing more becouse i'll go to sleep
مريم: no thanks ... روحي الله يحفظج
وتقوم مريم تشفج الكيس وتشوف مها شو طرشت لها
مريم: (وهي تكلم نفسها) لا فالحه حرمت اخوي مطرشه كندورتين وبدلتين ...
وغيرت ملابسها وبعد ما أذن العصر طلعت من الحجرة وشافت خالها طالع بيروح المسيد
بو راشد: اوووه مريامي عندنا اليوم
مريم: هلا خالي ...شحالك حبيبي.. ( وتروح تحبه على راسه)
بو راشد: بخير الحمدلله .. وينج انتي ما تنشافين ... من متى هنيه
مريم: خالي من طلعت من الدوام ييت هنيه
بو راشد: أنا زعلان عليج .. بالمرة قطعتينا
مريم: لا حبيبي كلا ولا زعلك .. إذا إنت زعلت علي من يسوى أراضيه
بو راشد: تبين تراضيني .. تقعدين عندي
مريم: إن شاء الله حبيبي .. إنت تامر أمر فديت روحك
بو راشد: زين أنا بروح المسيد الحين بلحق على الصلاة
مريم: اوكي خالي ... وأنا بعد أتريا خليفه بروح وياه صوب العزبة شوي ...
بو راشد: زين بنتي .. برايج
ويطلع بو راشد وبعدها بدقايق تسمع سيارة عند الباب وحد يهرن ، ويوم طلعت كان خليفه في النيسان يترياها
خليفه: ياللا خلينا نروح شو اتريين
مريم: زين لحظه يايه
وتركب مريم حذال خليفه في السيارة ... ويطلعون من البيت ، ويوم وصلوا صوب البدع
خليفه: هاه مريامي ... نروح صوب حراكه .. نلعب شوي
مريم: لا خليفه خلنا نروح العزبة عشان نرد بسرعة ما فينا
خليفه: ليش تخافين ؟؟
مريم: لا والله من منو أخاف
خليفه: ما عرف ... مب كلامج هذا اللي على الغدا
مريم: لا بس ما فينا نتأخر
خليفه: متاكده ولا ما تثقين في سواقتي
مريم: خليفه ... ما فينا على سلطان ولا نريد نتاخر خلنا نروح العزبة ونرد البيت قبل لا يوصلن خواتك عشان الحق أغير
خليفه: زين زين يالخوافه
مريم: ما برد عليك اوكي
خليفه: ما عندج شي تقولينه عشان تردين
ويطول على المسجل ... وحاطلها بالروغه
مريم : اووووف شو ها بعد لوعة جبد
خليفه: حليلج انتي .. نحن في البر شو تبين أحطلج بريتني سبير ولا جينفر لوبيز
مريم: لا ما قلت حط لنا اف ام أحسن
خليفه: ما اريد كيفي سيارتي
مريم: تصدق انك بايخ
خليفه: والله إذا مب عاجبنج خلي سلطان يردج
مريم: سخيف .... ما برد عليك
ويقوم خليفه يسرع بالسيارة في الرملة ويركبها على العراقيب ... وهي متمسكة بالقو وقاعده تحرطم
مريم: خليفه يا حمار مب منك مني أنا اللي ركبت وياك
خليفه: هاهاهاها كيفي سيارتي ردي ويا سلطان
مريم: انت حمار ... شو اتحراني ما برد وياه والله أرد وياه اذا تميت جيه
خليفه: هاهاهاها ما ترومين ... أصلا ما بيطيع يردج .. نحس خاصه انج رديتي عليه على الغدا
مريم: ما اريد ارد وياه ولا وياك بكلم دريولنا بخليه اييني
خليفه: هاهاهاها منوه بيخليج تردين وياه
وبعد ما وصلوا العزبة شافوا سيارة سلطان وحذالها سيارة موقفه
مريم: اوووووووه جنه في حد عند سلطان
خليفه: لا هذي سيارة عبدالله ولد عمي محمد
مريم: والله هو رد من امريكا ...
خليفه: رد من أمريكا وتوظف في أدنوك في بوظبي ... وسمعت أنه خطبوله بنت عمي سلطان بيزوج قريب عقبالنا يا رب
مريم: خلص جامعه انت أول .. بعدين أي مخبوله هذي اللي بتزوجك انت
وينزلون من السيارة ويدخلون صوب البوش .. ويشوفهم سلطان وهو معصب وعبدالله يبتسم لهم
سلطان: هاه خلصتوا هياته ولا بعدكم
خليفه: حشا الناس تقول السلام عليكم .. ارتاح لا رحنا لا هنيه ولا هناك من البيت على طول العزبة .. مريامي ما طاعت
مريم وهي كاتمه غيضها على سلطان وقررت انها تتجاهل كلامه
مريم: هلا عبود شحالك ... والله كبرت ولد خالي
عبدالله : مريامي أنا الحين موظف احترميني شوي عبدالله الله يهديج
مريم: هاهاهاها آسفين عبدالله شحالك وشحال هلك والبنات
عبدالله: والله يسرج حالهن إنتي شحالج وشو الشغل وياج
مريم: لا تسال تمام التمام
عبدالله: زين يوم انج تشتغلين في اتصالات نريد رقم مرتب يلا عاد راوينا شطارتج ..
مريم: فالك طيب .. بس انت تعال صوبنا وما يصير خاطرك إلا طيب ، وكيف تخطب ما تقولي ولا تخبرني ... شو تخاف احسدك
عبدالله: أفااا عليج انتي الخير والبركه .. أصلا كم مريامي عندنا
مريم: عيل
عبدالله: كلموا عموه بس هي قالت ما تقدر تيي يوم الخطوبه ... انا تخبرت عنها وعنج .. قالوا عموه كانت تعبانه شوي
مريم: بس ما اذكر أمي قالتلي
عبدالله: ليش من زود ما تسئلين عشان تقولج
وتحس مريامي ان نظرات سلطان بتحرقها .. وانه وده يذبحها بس ما تدري ليش .. ما تظن عشانها تكلم عبدالله لأنه عبدالله ولد عمه وولد خالها اصغر منهم بثلاث سنوات ودوم كانوا ربع قبل لا يروح يدرس في أمريكا بعد عرس روضه وهنيه يقاطعهم خليفه
خليفه: اي انت وياها بسكم عاد ... شو هالبسنج الكبير اللي سويتولنا اياه
عبدالله: هاهاهاها أفا عليك ... شحالك وشو الجامعه وياك
خليفه: لا حول ما عندك شي غير الجامعة ترمس عنه ... تعال تعال بنراويك انت وبنت عمتك الحلال أحسن
سلطان: خليفه ود مريامي صوب المخمريه وبنتها ... عبدالله يبغي يشل البعير عزبتهم ... بروح أراويه اللي عندنا عشان يتخير
خليفه: اوكي .. ياللا مريامي
عبدالله: خلينا نشوفج عاد تعالي بوظبي .. غلطي وزورينا شوي ترى ابويه خالج .. مثل ما عمي أحمد خالج
مريم: ان شاء الله ... الله يحفظك ... مع السلامه
عبدالله: مع السلامه
وبعد ما يقعدون شوي في العزبة ويلفون صوب البوش ... وخليفه يخبرها عن اللي ما تعرفهن من النوق يشوفون سلطان ياي صوبهم
سلطان: هاه خلصتوا بنرد البيت ... بيأذن المغرب بعد شوي .. بنلحق الصلاة في المسيد
خليفه: هيه نحن جاهزين ... عبدالله وين
سلطان: بيرد بوظبي مشغول .. شاف اللي يباه وراح
خليفه : عيل ياللا نروح ... هاه مريامي ويا منوه بتردين
مريم: برد وياك ويا منوه يعني برد ..
خليفه: متاكده
مريم: ياللا نروح
خليفه: بشروطي
سلطان: شعندك على بنت عمتك
خليفه: ماشي نتفاهم
سلطان : ( وهو يخزهم) على شوه
مريم: ماشي ... سر .. ياللا تعال خليفه
سلطان: على العموم أنا بكون وراكم خليفه مفهموم
خليفه: ليش لا يكون مركب وياي اليدي ديانا وبخطفها .. حشا
مريم: لا والله... أحسن من الليدي ديانا ... ياللا تعال نروح
وتروح مريامي سيارة خليفه .. أما خليفه فوقف يسمع سلطان يعطيه شويه نصايح وتعليمات ... وبعد ما ركب السيارة
خليفه: اوف منه حشا .. ما يعطي الواحد فجه
مريم: ليش شو قالك؟؟؟
خليفه: بذمتج يوم كنتوا تيون العزبة وياه يوم كان قدي، ما كان يسوي حركات
مريم: ليش ما تخبرته
خليفه: أنا أسألج الحين قولي
مريم : اممممم تصدق عاد إن سلطان كان حنون، مع أول صرخه أصرخها يخفف السرعة ويحاول يسوق بشكل يرضي جميع الأذواق
خليفه: كيف يعني
مريم: يعني روضه وحصه ونورة يبنه يسرع ... وأنا أخاف فكان يرضينا كلنا
خليفه: يعني يسوق سواقة خبلان على قولته
مريم: على الأقل أحسن من سواقتك
خليفه: وليش ما ركبتي وياه
مريم: ياللا خلنا نروح البيت
ويطلعون من العزبة ... بس هالمرة يسوق خليفة بطريقه محترمة لأن سلطان كان وراه وما كان يقدر يسوي حركات
***********






_________________

عبود
مشرف
مشرف

عدد الرسائل : 85
تاريخ التسجيل : 17/10/2007

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: أحلى قصة حب في أحلى مدينة ( العين)

مُساهمة من طرف عبود في الخميس أكتوبر 25, 2007 2:37 am

في بيت بو راشد

دخلت مريم الصالة ولقت بنات خالها وحريم عياله موجودات وحرمة خالها قاعده وياهن
مريم (وهي تبتسم) : السلام عليكم
الحريم كلهن : وعليكم السلام
حصه: لا لا لا هذي مريامي في بيتنا ... من وين يايه
أم راشد: مريامي خلاص .. عافتنا ، من رحتن ما قامت تيي شرات أول ولا تسأل عنا
مريم: خالوه حرام عليج والله إنتي دوم على بالي بعدين كنت أتصل أتخبر عنج وايي أسلم عليج دوم ، بعدين كنت في العزبة ... كنت ويا خليفه لمعلوماتج إخت حصه أنا من رديت من الدوام أنا هنيه
وتروح تسلم عليهن وشحالج ومن هالكلام حق كل وحده منهن
روضه: تدرين دخلتج هاي ذكرتني بأيام أول ... لو انج قطعتي مرة وحده
مريم: أنا ما قطعت إنتن اللي ما تين العين الا في الشهر مرة ، عيل وين رياييلكن وعيال خالي
نورة: في الميلس ، عندهم شباب هناك
مريم: هاه لين متى بتقعدن هنيه
روضه: لين يوم الجمعه ، بس حمد وأحمد بيردون بوظبي يعني بنقعد قعدة بنات محترمه
مريم: هيه بعد ما ترقدون عيالكم أول ، وينهم ما شوف حد فيهم
موزة حرمة راشد : الأولاد في الميلس عند خوالهم وأبهاتهم والبنات فوق في حجرة الألعاب والفيديو
حصه: وين خليفه وسلطان ، مب كانوا وياج في العزبة
مريم: راحوا الميلس على ما أظن .... أقول أنا بدخل أخذ دش سريع قبل لا يأذن يايه من العزبة وكلي رمل
حصه: اوكي ونحن بندخل حجرنا انتوضا وبنصلي

وبعد ما خلصن صلاة ردن يقعدن في الصاله
حصه: وين سلطان والله ولهت عليه من متى ما شفته
مريم: وخليفه لا يكون مب اخوج
روضه: لازم المحامي الأول مال خليفه ... حتى خليفه وحشنا بس خليفه دومه عندنا في بوظبي وما يقطع فديت روحه دومه يتصل
مريم: راعي واجب .... مسنع لازم
حصه: شو قصدج سلطان مب مسنع يعني
مريم: حشا أنا ما قلت
ويدخل سلطان هوه وخليفه من برع يايين من الصلاه وياهم أحمد وحمد رياييل حصه وروضه
روضه: ولد حلال تونا نطريك وحشتنا
خليفه: أنا أدري مشهور كل الناس تطريني
روضه: لا أكلم سلطان
ويقومن يسلمن على خوانهن
سلطان: هلا والله وأنا أقوول شو هالنور اللي منور المسعودي ثركن انتن هنيه
روضه: هيه هذا كله نوري
خليفه: كان موصل لين العزبه .... خيبه مولد كهربا هب نور
حمد: هاهاهاها شو تقصد حرمتي تجذب يعني
أحمد: هاهاهاه لو سمحت هذا نور حرمتي هب حرمتك
خليفه: ونك عاد انت وياه .... بابا المسعودي اليوم منوره ليش ان مريامي عندنا .... نور العين كله هذي
مريم: الله يجبر بخاطرك ولد خالي مشكور
أحمد : هاهاهاه شحالج بنت عمتي ، عاش من شافج كم مرة ييت العين ما شفتج وين انتي مختفيه
مريم: ادل بيتنا لو صدق تبغي تسأل جان مريت علينا
أحمد: هاهاها لو أقولج مشغول بتصدقين
مريم: لا ما بصدق
أحمد : عيل ما بقول
مريم: هاهاها لا تقول ،شحالك حمد وينك ما تمرنا
حمد: اخاف أقولج مشغول ما تصدقين
مريم: هاهاها تراكم دوم اتعلثون بمشغول هاي
حمد: وين عمتي بنسلم عليها، نحن بنسري بوظبي الحين
روضه: شو ما قعدتوا
أحمد: نريد نوصل قبل المباراه بنشوفها هناك
حصه: بتروحون رباعه ولا بتتابعون
حمد: لا بوقف سيارتي هنيه وبنروح في سيارة أحمد
روضه: أحسن بعد
سلطان: أنا بعد بروح بوظبي عندي شغيلات بقضيهن ... مريامي روحي جهزيلي شنطتي
روضه: ليش بتروح بوظبي
حصه: وين بتروح نحن اليوم يايين ، شو هالمذهب اللي عندك
سلطان: برد باجر ، بروح سويحان العزبه عند عبدالله وبنبات هناك
حصه: قول سويحان هب بوظبي
سلطان: زين سويحان ...
روضه: وبعدها مريامي تسويلك الشنطه ، يوم ما كانت في بيتنا منو يسويلك الشنطه
سلطان: بروحي ، بس هيه هنيه اليوم خلها تذكر أيام أول
مريم: اوكي بروح أسويلك الشنطه ، بتين حصه
حصه: لا بقعد ويا ريلي بيروح بوظبي الحين ، بس غريبه مريامي غاديه مطيعه
مريم: ربج بعد ، كبرنا
وتروح مريامي فوق غرفة سلطان ومن داخلها معصبه عليه، لأنه يوم قالها تروح تسويله الشنطه كان يعطيها أمر مب يطلب بأدب، بس ما حبت تكبر السالفه جدام عيال خوالها
خليفه( يصارخ وهي طالعه الدري) : اوووووووووه مريامي تسمع الكلام وما تسأل عن الكلمه السحريه، أقول سلطان مريامي عشان تسمع الكلام لازم تأمر عليها
وما سمعت سلطان شو رد عليه اللي سمعته انهم قاعدين يضحكون
*****************

في غرفة سلطان
كل شي في مكانه ما تغير ... طلعت الشنطه الصغيره اللي يستخدمها يوم يروح يبات يومين أي مكان وحطتله فيها وزارين وفانيلتين كل شي كان مكانه وين ما تذكره، وطلعت له فوطه وحطتله في الشنطه جراجة تيلفونه وفرشاة أسنان يديده ومعجون، وحطتله عطر لوليتا لمبيكا رجالي من على التواليت في الشنطه... وصكتها وقفت تطلعله كنادير
وهي يالسه تدورله طربوشه حق الكندورتين اللي طلعتهن دخل سلطان الحجرة
سلطان: حطيتي الجراجه
مريم: ايوه
سلطان: وعطر
مريم: حطيت لك لوليتا لمبيكا اللي على التواليت، وحطيت لك فانيلتين ووزارين وفوطه إذا بتقعد لين المسا باجر أو بتروح بوظبي ، وحطيت لك في الكيس اللي بتعلق فيه الكنادير كندورة سودا وحده بيضا، يمكن يبرد الجو في الليل عشان تغير
سلطان: والغتر
مريم: علقت لك وحده بيضا وثانيه حمراء عشان تلفهن
وطلعت مريم وهيه تكلمه الطرابيش حق الكنادير وحطتهن في مخبا كل كندورة .
مريم: تريد شي بعد
سلطان: لا مشكورة
مريم: العفو ... بطرش روز تنزل الشنطه والكنادير
وتطلع مريم من الحجرة قبل لا يقول اي شي ثاني وتنزل تحت وتطرش الخدامة
كانن بنات خالها حصه ونورة وروضه قاعدات جدام باب الفيلا ... فطلعت تقعد وياهن
مريم: مرحبا
حصه: هلا رتبتي شنطة سلطان
مريم: رتبتها والحين روز بتنزلها
روضه: غريبه يعني رحتي ترتبينها هالمرة دون ولا كلمة ولا اعتراض
مريم: لا يا غبية ... يوم أسمع الكلام وما ارد عليه ينغاض أكثر ، بعدين كبرنا على حركات اليهال
حصه: صدق انج لعينه
مريم: اخوج اللي يبدا ويتسيخف علي، المهم وين احمد وحمد راحوا خلاص
حصه: راحوا ربي يحفظهم ان شاء الله
مريم: عيل وين راشد وسعيد ما شفتهم
نورة: في الميلس ، حمدان اخوج عندهم
مريم: صح قالي بيي اليوم ، عيل وين اخوي ناصر نورة ما شفته
نوره: راح بيتكم يسلم على عمي وعموه ويمكن الحين في الميلس ويا حمدان
مريم: لحق حمدان على احمد وحمد
حصه: هيه شفناه هنيه وسلمنا عليه
مريم: وخليفه وين
روضه: طلع هذا مثل الزيبق ما يقعد
وهنيه يطلع سلطان بعد ما تسبح ومتعطر وريحة عطره شاله البقعه
سلطان: شو تسون هنيه
حصه: نسولف ... قاعدين نتذكر أيام مضت
سلطان: وين عيالكم
روضه: موزه وعاشه يعشونهم مع عيالهم عشان يرقدون بعدين
سلطان: يا حافظ وانتن قاعدات هنيه ومخليات حريم خوانكم يمسكون عيالكم
نوره: والله يوم كنا هنيه في بيت ابونا مسكنا عيالهم ليش هن ما يمسكن عيالنا شوي
سلطان: زين انتي وين ريلج ما شفته
نورة: في الميلس وياه حمدان
سلطان: زين دخلن داخل الحين أنا بروح اشوفهم في الميلس وبطلع بروح سويحان.. اقول مريامي حطوا الشنطه والكنادير في السياره
مريم: حطوهن
سلطان: اوكي عيل مع السلامه اشوفكن باجر
نوره + حصه+ روضه+ مريم : مع السلامه
مريم: عسى الرب حافظنك ....
وقامن دخلن داخل ....
روضه: بروح أشوف عيالي وبرقدهم
مريم: من الحين حرام عليج توها الساعه 7
روضه: لين ما أغيرلهم وأرقدهم بتصير ثمان بعدين أحسن عشان نتفيج نقعد مع بعض
حصه: وأنا بعد بروح أشوف عيالي
مريم: وانتي نوره ما بتروحين تشوفين عيالج
نورة: لا نحن بنروح البيت عندكم، أتريا أخوج ايي من الميلس ، انتي الليله بتقعدين هنيه ما بتردين وياي
مريم: هيه بقعد من زمان ما قعدت ويا حصه وروضه
نورة: زين
وهنيه تطلع أم راشد من حجرتها متلبسه وشاله عباتها
نوره: وين بتروحين أمايا
أم راشد: بروح شوي صوب مريم حرمت ولد خالي جمعه تعبانه
نورة: سلمي عليها
أم راشد: ان شاء الله ، وانتي مريامي عن تروحين قعدي الليله هنيه
مريم: ان شاء الله خالوه ، الليله ببات هنيه
وتطلع أم راشد وتقعد مريم ونورة يسولفون عن العيال ، وبعد شوي يدخل عليهم ناصر وحمدان وسعيد وراشد
راشد: السلام عليكم ... شحالج مريامي وشحال الدوام وياج
مريامي: يسرك الحال شحالك انت ، وشحالك سعيد
راشد: بخير وينج ما تنشافين
مريم: موجوده في هالدنيا
سعيد: يقولون انج ما تقعدين في البيت شرات اول
مريم: اول ما كان فيه دوام وشغل وبعدين اذا قعدت هنيه منوه بيقعد عند ابوه وامي ... أول نورة وناصر وحميد وحرمته في البيت الحين ماشي غيري أنا ومها وحمدان دومه برع
حمدان: هاهاهاها رديه مني الحين
مريم: محشوم يا بو أحمد
حمدان: هاه بتروحين وياي ولا
مريم: لا بقعد هنيه اليوم روح برايك
حمدان: زين على راحتج
سعيد: عيل وين حريمنا ووين أمي
نورة: حريمكم في حجرهن وأمي طلعت وخواتي يرقدون عيالهم
ناصر: عيل ياللا انتي ييبي العيال خلينا نروح
نورة: الأولاد وين كانوا عندك
ناصر: برايهم طلعوا ويا خليفه اخوج
نورة: زين بروح اييب سلمى وبزقر الخدامه
ويطلعون عيال خالها حجرهم وتروح نورة وناصر وحمدان
**************

_________________

عبود
مشرف
مشرف

عدد الرسائل : 85
تاريخ التسجيل : 17/10/2007

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى